المساعد الشخصي الرقمي

مشاهدة النسخة كاملة : شو رايكون نبدّل سائق التاكسي .. بسائقة ؟؟

هنّوءة
10-06-2006, 01:21 AM
كلنا بنعرف انو باوروبا النساء ممكن كتير يشتغلو بمجال المواصلات العامة يعني ممكن كتير نطلع بتاكسي ونشوف بنت اللي عم بتسوق ..او بباص او حتى بالمترو
لو صار في امكانية انو تتطبق هالقوانين ببلادنا العربية ... انتو بتايدو او بتعارضو ...
و بتتمنو تطلعو بتاكسي فيها السائق من الجنس اللطيف ...
و للبنات ... ممكن تشتغلوا هيك شي ؟؟؟
على اعتبار انو في بنات بيششتغلو سائقات لسيارات بنات الامراء و الذوات في الخليج ... طبعا لانو ما لازم ( براي اهلون ) يطلعو مع رجل غريب
بي باي
مجنون شهد الأول
10-06-2006, 02:04 AM
هنوءة

دائما مميزة بالمواضيع المطروحة للنقاش

بس هالمرة بعتقد أنك اشعلتي فتيل قنبلة والله يستر

خخخخخخخخخ

هنوءة عمل السائق ( وخاصة سائق التكسي ) يتطلب قدرة تحمل عجيبة

غريبة

عليه تحمل عناء السواقة وطبعا هذا شيئ صعب نظرا لطول مدة العمل

عليه تحمل أهواء الراكب ومزاجيته يعني بدو يكون باله للسائق أطول من

نهر النيل

وغير هذا هناك اعطال قد تصيب السيارة أثناء العمل

( يعني اذا هوت العجلة فهل تستطيع الفتاة ابدالها )

هذه الأمور من الناحية العملية

أما من ناحية المجتمع :

فأنتي تعلمين تماما أن ما تطرحينه صعب بل مستحيل التحقق

لأسباب أظن أن الكل يعلمها

شكرا لك بالنهاية على الطرح الموفق

بس بحب قول رأيي أنه أنا مع قيادة الفتاة للسيارة ولكن لست مع عملها

كسائق تكسي للأسباب التي ذكرتها بأول الرد وليست للأسباب الاجتماعية

لأن كلام الناس لابيقدم ولا يأخر
مــ الاحساس ـرهف
10-06-2006, 05:41 AM
هنوءة مشكورة عالقنبلة المرمية



طبعا انا ما بايد فكرة بنت تشتغل شوفير




لا تاكسي و لا سيارة خاصة



لاني في شي بالسواقة ما بتقدر تتحملوا البنت



يعني الارتباك مثلا في كتير بنات بتلبكو و هم بيسوقوا



و بالاخير بقلك هادا مجرد رايي مو اكتر



و طبعا اذا صار و سيارات التكاسي اشتغل عليهن بنات



فانا اول واحد بصف سيارتي و بطلع تكاسي


خخخخخخخخخخخخخخخخخخخخخخخخ



مشكورة مرة تانية و لا تحرمينا من مواضيعك الروعة
هنّوءة
10-06-2006, 11:29 AM
والله يا حسام الموضوع صحيح قنبلة ...
بس ايام زمان كانت فكرة خروج البنت للعمل و للدراسة كمان شي كتير مو مألوف
ولما عم نشوف انو نحنا عم نكون صورة مستنسخة للغرب فبتوقع انو يجي يوم نشوف فيه السيدات وراء الديركسيون متل نساء يوروب و اميريكا
بس بالنسبة للاسباب الي ذكرتها ممكن نلاقلها حلول
اول شي العناء ...
نحنا صرنا عم نشوف المراة باماكن شغل وبوظائف مرهقة اكتر بمية مليون مرة من شوفير التاكسي
ما رح ابعود كتير
اعتي بتشتغل طباعة على الكمبيوتر .. بتتخيل انو بتضل تطبع من الساعة 8 الصبح لل3 الضهر .. بدون توقف و بسرعة .. وفيه مية موظف فوق راسها عم يستعجلوها ... هيدي عيّنة ... وانا رايي انو تشتغل على التاكسي اسهل ة اربح .. على القل لما تتعب بتاخد بريك
مشان النفسيات التعبانة والبال الطويل
صديقتي مدرّسة ... بتقعد من الصبح لبعد الضهر كل يوم ... بالمدرسة
مديرها انسان متخلف اخد بكالوريا و بيلبوس جلّابية و شحاطة بالمدرسة لانو بجنب بيتو .. بيقعد بيبهدلها قدام الطلاب اذا تاخرت خمس دقايق على الحصة
وبتضل بتشرح من لما توصل للما بتروح و الطلاب صم بكم لا يفقهون
وبيوم من الايام قررت تسمّع لطلاب البكالوريا قام طالب من مقعدو لما قالتلو انو مهمل .. و ضربا كفّ .. ولما اشتكت للمدير قاللها انو هيدا بكالوريا ما فيو يساوي معو شي
فيه اكتر من هيك نفسيات مريضة .. وهيدي مو حالة من حالات نادرة ... هيدي بتصير كتير .. وبيصير افظع مع انو (التعليم للبنات ).. هيدا غير الموظفات اللي لازم يستحملو زعيق المراجعين على مدى تمان او تسع ساعات .. او اكتر

وبالنسبة لقصة الاعطال الميكانيكية ... فيه كتير بنات بيسوقو سيارات
و انا باعرف من حالي .. لما يصير معي اي عطل .. باتصل بالميكانيكي .. وهو بيصلحها و انا قاعدة عم بتفرج عليه
ما في داعي لوت ايدي اذا كان فيه حدا ممكن يشتغل ههالشغلة صح
وكلام الناس متل ما قلت رح يضل عائق بس مع الوقت ممكن يتاقلمو
بايات و عذرا عالاطالة
هنّوءة
10-06-2006, 11:34 AM
والله يا احمد قصة انو البنت بترتبك ... هيدي مو قاعدة
ومو شرط تمشي البنت على المية و عشرين لحتا تكون سائقة ماهرة
انا برايي اي شخص بنت او شب لما بيكون عم يتعلم السواقة جديد رح يرتبك .. بس بالنهاية بيتعلّم منيح ...
و مو منطقي ابدا نضل كلما بدنا نطلع مشوار نترجى ابونا او اخونا لحتا يطلعنا
اذا قادرين نجيب سيارات خاصة بنريحكون مننا صح ؟؟؟
ميرسي على المشاركة وباعرف انك ما حتصدق يتطبق هالشي .. مو مشان شي .. بس لحتا ترتاح من غلاظة سواقة سيارتك مو ؟؟؟
بي باي
الشهداوي
10-06-2006, 10:18 PM
انا برأيي في شغلات ممكن ممارستها

تأثر على انوثة البنت


يعني تخيلوا بنت تكون طوبرجي

او ميكانيكي

او عتال

او دهين

او سائق تكسي

هاد اولا



اما ثانيا فبرأيي مجتمعاتنا غير جاهزة للفكرة

يعني بدنا اول شي نزرع فكر جديد للمجتمع نفسوا

قبل ما تمارس البنت هيك شغلة

حتى لو لقينا بنت ترضا فيها



و شكرة على الموضوع الناري هنوءة
هنّوءة
10-07-2006, 08:40 AM
هايات اياد
انا رايي انو المهن اللي قلتها قبل سائق التاكسي كلها معك حق فيها بتجرح انوثة البنت وما بتتناسب معها
بس انا طرحت الموضوع لانو هالمهنة باوروبا و امريكا و حتى باستراليا موجودة
يعني هنيك المراة ممكن كتير تقود تاكسي او ميترو او باص ...
او بتكون عم تقتطع تذاكر
وبالنسبة لراي المجتمع انا ما تطرقت للموضوع .. يعني المتمع رح يتكيف مع اي شي متل ما تكيف من قبل مع اشيا هلا لما نشوف انها كانت محرمة بالمسلسلات بنضحك و بنستغرب
ميرسي كتير على مرورك الحلو ...
وما تستغرب بكرا تشوف بنات على الطنبر او عم يدهنوا ويحددو
بي باي
0ـُرجان
10-12-2006, 02:53 PM
الفكرة من الناحية النظرية ممكنة بس من الناحية التطبيقية مستحيلة

يعني انا بعتقد انو في شغلات بالمجتمع غير قابلة للتغيير او التطوير بهذه

البساطة

بعدين كتير مهم انك ما تنسي الفروق و الاختلافات المحيطية بين سائق

التكسي ببلدنا وسائق التكسي بالغرب

اول الشي طبيعة نظم المرور و قواعد السير مختلفة يعني انا متأكد انو رح

يكون اول يوم لاول بنت بدها تجرب تصير شوفيرة تكسي يوم اسود لأنو

السواقة ببلدنا حسب آخر احصائيات لمنظمة السير العالمي شي بقطع القلب :eek: :eek: :eek:

طبعا هذا عدا انو هي البنت بدو ينتشر خبرها في جميع ارجاء المعمورة ويمكن كمان بالجزيرة او ال /BBC/ :p :p

انا متفهم لانو الهدف من هي المسألة هو الشعور بنوع من التوازن بالمهام بين الجنسين في المجتمع الواحد بس بتمنى انو يكون هدا التوازن في امور اخرى اكثر اهمية وترفع من مكانة بلدنا بين الامم

شكرا هنوءة على الموضوع :)
هنّوءة
10-12-2006, 03:35 PM
هايات اخي
طبعا انا اذا سالتوني عن رايي فبرفوض اكيد اشتغل انا او اي بنت شوفيرة تاكسي
لاني بعتقد انو اي انسة مو معقول تخدوم حدا
لازم الكل هن اللي يخدموها ويوصلوها لاي مكان بدها ياه
بس بالمبدا ... اذا اضطريت .. فمتل ما بوصّل حالي بالسيارة ممكن اوصل غيري
ميرسي على مرورك .. وحكيك كتير منطقي
tareq
10-18-2006, 09:15 PM
قيادة التكسي عمل شاق وفي بلدنا تحديدا لا مكان للضعيف بين الاقوياء لاننا نعمل ونكد وبالكاد نجمع ما يكفينا
هنّوءة
10-18-2006, 10:31 PM
بس كمان بلدنا بلد الفرص ... و المجدّ بياخد نتيجة ... و الادلة اذا اتطلعنا منيح بنشوفها بكل الاماكن
عمل التاكسي متل اي عمل تاني .. و اذا فكرنا منيح بنشوف انو ما في اي مانع تشتغل .. الا التقاليد اللي عم تتغير تدريجيا
مع الزمن
شكرا على مرورك اللطيف
بي با ي
MayOoOshe
10-29-2006, 04:07 AM
هنوءة شكرا على مواضيعك الحلوة

وطرحك لأفكار مميزة للنقاش



بالنسبة الي بشوف انو شغلة سائق سيارة ما بتناسب انوثة البنت

لأنو المرأة بطبعها كائن رقيق مهما كانت جريئة وقد حالها

وصعب انها تتعامل مع المجتمع الشعبي لسائقين للتكاسي والباصات


اضافة لأنها معرضة لمواجهة كل اصناف الناس

وممكن تنحط بمواقف ما تقدر على مواجهتها

مثلا اذا طلع معها واحد سكران او محشش أو واحد مشكلجي وما بدو يدفع

اكيد ما بتقدر تواجه هيك اصناف

أما بأي مجال تاني من الوظائف فالشريحة الي ممكن تتعامل معها بتبقى محددة اكتر

وبيبقى في نظام وأمن بأي دائرة رسمية


انا مو ضد الفكرة بس بشجع اي مجال عمل تاني يحفظ للمرأة كرامتها وانوثتها


وبالنسبة لنظرة المجتمع

اكيد الكل بيتخيل انه رح يعارض

انا بقول بالبداية المجتمع بيعارض

لكن لما اي مرأة بتحتاج كتير وما بيكون عندها مصدر دخل

فأكيد شغلة سائق تكسي أفضل من شغالة أو ....

ولما الناس بتعرف حاجة هالانسانة للمصاري واختيارها طريق الحلال للحصول عليه

أكيد رح يحترموها ومارح ينبذوها


شكرا كتير هنوءة عالموضوع المميز
هنّوءة
10-29-2006, 05:51 PM
أهلين ميّوشة
طبعا اذا فكرنا بالموضوع بشكل جدّي طبيعي لا انا ولا اي بنت بترضى تنحطّ البنت باي موقف مو مناسب .. من المواقف اللي ممكن تنحط فيهون و هي عم تشغل كسائقة ..
بس نحنا عم نعمول افتراض ... لو كان المجتمع تبعنا ارقى بشوية ... ولو كان فيه احترام للعملو للعامل شو ما كان .. كان ممكن كتير انو تكون البنت سائقة تاكسي .. ما في اي شي بيمنعها تقود تاكسي متل ما بتسوق سيارتها الخاصة
و الغريب انو نفس الانسان اللي بيستهجن منظر البنت اللي بدها تسوق تاكسي بيمدح البنت اللي بتسوق سيارتها
وهون الشي اللي كنت عم حاول اوصلو
ومتل ما قلتي .. شغلة سائقة تاكسي اكيد افضل من انو تكون شغّالة بالبيوت .. و هي المهنة اللي ما حدا بيعترض عليها على اساس انو حرام عادية تشتغل بالبيوت بدافع الحاجة
شو بدي احكي لك ميّوشة .. مجتمعنا صاير متل المراية .. بنشوف كل شي واضح وصادق .. بس بالعكس
ميرسي على مشاركتك الحلوة
بي باي
&wissam&
12-18-2006, 01:12 AM
مشكوووورة هنوءة عالموضوع الرائع
انا وعم بقرا الموضوع تصورت اني طالع بباص واللي عم تسوقوا وحدة بنت
اخخخخخخ لو تعرفوا شو صرلي
ههههههه