التوبة ممنوعة

[هنّوءة]

سلام للكل
اليوم اجيت مع موضوع صارلي يومين بفكر فيه .. و ما عم بيروح من بالي ابدا ......
من يومين اعدموه للرئيس العراقي السابق .. صدام حسين ...
صحيح اني زعلت و تدايقت .. بس ما هيدا اللي شغلني
اللي شغلني هو الاثنين الباقيين اللي اجلو اعدامهم لبعد العيد ...........
مو حرام التحكم باقدار البشر بهالطريقة ؟.؟؟؟؟ يطولو اجلهم او يقصروه ...وهنن يقررو انو خلص ... حاجتون هيدول الناس لازم يتعاقبو بدون رحمة .... ولازم نقتلهون –بعد العيد – وكانو شي صفقة او مشروع مشوار ...
و السؤال اللي ما عم يروح من بالي .. شو بيكون شعور هيدول المحكومين و هنن بيعرفو انو باقيلون يوم و شوية وبيموتو .. و ما فيه حدا على وجه الارض ممكن يغير هالشي ....
هل ماتت الرحمة بقلوب البشر لهالدرجة ؟؟؟؟ ما بيكفي عذاب تلات ايام العيد اللي مرو عليهون و هنن ناطرين ساعة الاعدام
هالتعذيب المستمر مسموح بشرعة حقوق الانسان ؟؟؟ و ما بيشفعلون هالرعب المستمر على ماضيهون الاسود ( حسب اعتقاد سجّانينهم ) ....
هل يجوز لانسان ان يقرر انهاء حياة الاخر .... مهما كان المبرر
وهذا يقود الى السؤال الجوهري .... هل انت مع عقوبة الاعدام ؟؟؟
في حالة ارتكاب المدان جرائم فظيعة ؟؟؟؟؟؟؟
و اليس الاعدام بحد ذاته جريمة .. و البديل لها هو السجن لفترة طويلة نسبيا .. يعني ما في فرصة للتوبة و الندم ابدا .... ؟؟؟؟؟؟
بي باي

[ღكــزبــك حــلـــوღ]

بصراحة بعتقد انكن كلكن و هنؤة خاصة

تستغربوا رأي لأني انا مستغربته كمان

بس انا مع الاعدام...!

خاصة بحق مجرم فظيع , لم يحرم احد

ولم يغفر لأحد !!

فكيف ينتظر رحمة الغير له ؟!!

الف شكر هنؤة للطرح الرائع الذي يدل على ذكائك

[هنّوءة]

لوليتا .. بدك تسمحيلي هالمرة
انا مو معك .. بالاعدام
اذا اعدمناهم بدون رحمة بنكون متلون .. بل واسوأ ... لانو هو براي الجميع سفاح ... اما نحنا بشر ....
انا بعتقد انو الروح هبة من الله ... ما حدا حقة ينزعها من انسان .. فقط الله هو اللي الو هالحق
وبكل الاحوال صدام انعدم و هيدا ما بقا موضوع قابل للنقاش ... بس اللي عم اناقشو هم الناس اللي رح يموتو بكرا و هنن بيعرفو تماما هالشي .....
هل من حق انسان ينزع روح انسان تاني و يعتبر حالو عم يعمل شي صح و ما يكون مدان من كل الناس

[نور حيلاني]

شكرا هنوءه على الطرح وبصراحه اعدام الرئيس صدام خلاني متوتر طول العيد

بالنسبه للاعدام فانا ضد الاعدام

صحيح صدام له اخطاء ولكن هذه الاخطاء بالنسبه لمايحدث بالعراق وما فعلته الحكومه الحاليه وامريكا يعتبر لا شيء وهذا ما يكرره الشارع العراقي

اما بالنسبه لتحكم باقدار الاخرين اعتقد في شريعة الغاب التي نعيشها نحن شعوب العالم هذه الايام هو شيء مبرر

شكرا هنوءة على الطرح وارجوا ان الا ياتي العيد القادم الا وقد انتصر (العراق)

[هنّوءة]

اخي نور ... شكرا على كلامك ... و فعلا متل ما قلت
اللي قتلون صدام بتلاتين سنة قتلوهم الامريكان بشهور قليلة
العراق اكثر دولة مظلومة على وجه الارض ... عانى اهلها عذابات على مر السنين .. كل الشعوب عندها مقدار من الامن ... الا العراق ...
صدام صحيح كان بلا قلب .. بالتعامل مع المتمردين على حكمو .. بس بنفس الوقت هاليد الحديدية اللي كان يملكها على هالناس ضبطت العراق .. و خلت معظم العراقيين يشعرو بالامان
و الاهم انو هالشي موجود بمعظم دول العالم .. لازم الدولة تكون مستلمة زمام السلطة على كل الارض .. لحتا ما تعم الفوضى .. هيدي الفوضى اللي ظهرت مباشرة بعد غياب صدام ... ومجيء الامريكيين مع ديموقراطيتهم الرااااائعة و البراقة
اليوم ... 3000 جندي امريكي ماتو بتلات او اربع سنين
و الفين مواطن مدني عراقي ماتو بالشهر الاخير ......
يعني ... صدام .. ملاك بريء ... مقارنة بجورج بوش
وفعلا .. انا ناطرة بشغف .. اليوم اللي بيحاكمو فيه جورج بوش على جراءمو اللي عملها بارادتو ونشرها على كل ارض من اراضي العالم
بي باي

[ღكــزبــك حــلـــوღ]

هنؤة انا لا اتكلم عن صدام..انا اتكلم عن اي جبار لا يرحم

ثانيا..لو كان سلب حياة اي شخص مجرم حرام..فلما سمح الله به؟؟!

على فكرة حتى الاعدام كان على زمن الرسول وكان جائز و غير محرم

للمجرمين السفاحين فقط طبعا..

[هنّوءة]

يا لوليتا .....
الله سبحانه اكيد حلل قتل القاتل ... بس بنفس الوقت ... الاسلام امر بالعفو عند المقدرة .. وكمان ... الرحمة ...
انا ضد القتل .. و الاذى .. و الظلم أي كان سببه او مسببه ... و انا ما بدي أي انسان سفاح يطلع متل الشعرة من العجين .... بس كانو فيهون يعاقبوه بطريقة تانية .. و يتركو مجال للتوبة ... يسجنوه للابد ... افضل من انو يسلبوه حياتو
لهيك ... الافضل انو ما يقتلوه ... لانو القتل بشع ... فعل كتير مؤلم .. و المؤلم اكتر هو الاثنين اللي ناطرين هلا الموت .. حطي حالك محلون ( لاسمح الله ) حاولي تفكري باللي هلا عم بيفكرو فيه .. بتعرفي شو قصدي انا هلا
وبرجع بقوللك .. انا ما بدافع ابدا عن انسان قاتل .. بس بنفس الوقت ما برضى اني انزل بنفسي لمستواه الانساني ... و اعاملو متل ما عامل الناس
هيدي وجهة نظري
وعلى فكرة انا كتير هلا مرتاحة لاني نزلت موضوع بالنقاشات و عم اتناقش معك انتي تحديدا لوليتا ... لانو بعرفك منيح ... و انتي عم تحكي بلسان حالي اللي فرح شوية لتحقيق العدالة لناس انظلمو ... بس بيضل الصوت الاغلب هو صوت الالم لقتل انسان اضافي
ولما رح اوصل انا و انتي لنتيجة .. رح ارتاح سواء اقنعتك او اقنعتيني

[ღكــزبــك حــلـــوღ]

يمكن يكون معك حق هنؤة...

بس انا يمكن شوي منفعلة مشان اخر اعدام صار بحق صدام

خاصة انهم عملوا اكثر من حلقة عن جرائمه..

الله يعين العالم,,انا كمان مبسوطة اني عم اتناقش معاكي

[ملك سوريا الأسد]

يا شباب و يا صبايا
خلونا برى موضوع صدام والإعدام أريح
بس شي حلوووووووووووو كتير
سي يو

[عصي الدمع]

أنا مع هنوءة في كل ما قالته

مع احترامي لجميع ما قالته لوليتا ولها وجهة نظر أخرى


شكرا

[مــ الاحساس ـرهف]

هنوءة شكرا عالطرح الموفق


و لكل منا وجهة نظر و يمكن حدا يقتنع من التاني و يمكن لا


انا باعتقادي يمكن يكون ردي ديني شوي بس هادا رايي


اني الله خلق كل واحد و خلق عمروا معو و رزقوا


و بالاضافة لهالشي خلق الشي الاهم و هوو العقل ليقدر الانسان


يميز الخير عن الشر و بختار الطريق الصح


و اكيد مو كل العقول صح


مشان هيك انا على قاعدة متل ما بتزرع بعمرك بتحصد باخروا


بس كوني على ثقة اني اله ما بيظلم حدا و اكبر مثال


سيدنا ابراهيم لما اجا بدو يذبح ابنو كيف السكي ما تذبح


و لما شلفها من ايدوا شطرت الصخرة لنصفين


و انا سمعان عن عملية اعدام صارت من زمان


و كان فعلا اللي رح ينعدم مظلوم فانقطع الحبل 3 مرات


و بعد هيك اخلوا سبيلوا


هادا دليل واضح اني الله ما بدو يئذي هالشخص لانو مظلوم



و مع كل انسان رب العالمين اللي موكل عنو و الله ما بيظلم حدا


و لا تنسوا الاية الكريمة بعد بسم الله الرحمن الرحيم

(( و بشر القاتل بالقتل حينا و لو بعد حين ))

صدق الله العظيم


شكرا مرة تانية هنوءة و اسف عالطولة


باااياااااااات

[0ـُرجان]

شكرا الك هنوءة على الموضوع المطروح

بصراحة يؤسفني فعلا انو القيم والمبادئ تنقلب بشكل غريب لما اي موضوع على شبكة النت بكون يتناول صدام وتاريخه السيئ او حتى مرحلة اعدامه

للأسف اذا سألنا مواطن عربي في عصرنا الحالي السؤال التالي

استخرج من هذه الكلمات الكلمة الشاذة

(( شارون - ميلوسوفيتش - صدام حسين - صلاح الدين ))

لربما انه قد سرح قليلا وتمهل لكي يختار ما بين صلاح الدين وبين صدام فاذا اختار صلاح الدين مثلا دون صدام فربما قد يكون بذلك قد خدر ضميره فصدام طبعا معروف بالنسبة له (( وانا لا اعاتبه فقد تربى ونشئ على ذلك )) على انه الفارس المقدام الذي رمى اسرائيل يوما ما بفتيشتين (( فتيشتين بالسوري = مفرقعات العيد )) وهو الوحيد الذي قال لا لامريكا ولم يحني راسه للاستعمار ومن هذه الاسطونات الميتافيزيقية

ولا اعلم حقا لمَ نتناسى ان صدام كان العوبة بيدي الامريكان لا ليس العوبة بل شريكا لان العوبة تعطي معنا ان صدام كان ساذجا وقد انضحك عليه وهو على عكس هذا تماما

لمَ نتناسى الحرب العراقية الايرانية التي جر بها صدام العراق الى حرب لم يجنِ منها العراق الا الموت والويلات
لمَ نتناسى مجازر حلبجة ضد الاكراد العراقيين وسحقهم بالكيماوي اطفالا ونساء وشيوخا بلا شفقة ولا رحمة وكانهم فئران تجارب لاسلحة صدام
لِم نتناسى قبر 180 الفا ايضا من ابناء الشعب العراقي من الاكراد احياء وردمهم تحت التراب كما هم
لم نتناسى قمع صدام للشيعة من العراق وقتل علماءهم ومشايخهم
لم نتناسى غزو صدام لدولة عربية شقيقة جارة ( الكويت ) وقتله لابنائها بلا ذنب ولا سبب الا لنزواته البائسة الاجرامية !!
لمَ نتناسى ايضا محاولات صدام في اقامة انقلاب على النظام الحاكم في بلدنا سورية آنذاك
لمَ لا نعترف بان صدام هو من كان وراء قتل وتهجير ملايين العراقيين الابرياء وهو من كان وراء صرخة كل ام ثكلى فقدت ابنها بسببه

لمَ و لمَ و لمَ ...... والحديث يطول

الخلاصة هنوءة صدام حسين قد قالها يوما ما بنفسه (( لديه في المنزل العديد من الكتب والروايات عن ستالين وهو معجب بشخصه كثيرا )) هذا الطاغية الروسي الذي قامت روسيا في عصره على جثث ومقابر بني جلدته

هذه هي المدرسة التي تخرج منها صدام مدرسة هتلر وستالين وموسوليني وهولاكو وكل طاغية قد ذكره التاريخ وسطر صفحاته بحبر اسود قاتم مظلم

لذلك ولهذه الاسباب اعلاه انا لا ارى في اعدام شخص مجرم كصدام اي اهانة لاي انسان على وجه الارض لا مسلم ولا مسيحي ولا يهودي ولا بوذي ولا مجوسي لان صدام وبصراحة لا يمت للاسلام ولا باي صلة فان افعاله وجرائمه لم يسمح بها ولا اي دين سماوي

اما اذا ناقشنا الموضوع من ناحية انسانية ودخلنا من خرم باب ما يسمى بحقوق الانسان فهذا يؤدي بنا الى نتيجة بانه اي مجرم في هذا الكوكب يحق لنا ان ندافع عنه ونمنع عنه الاعدام لانه انسان فحينها علينا ان ندافع عن شارون اولا !!

بشكرك مرة تانية هناء على الموضوع وهذا في النهاية رأيي وانا متمسك فيه وردي كان مو موجه الك بشكل خاص قد ما هو موجه الى طبقة كبيرة للاسف لسا لهلق بتدافع عن صدام وبتحزن على موته وبتنسى فعايله وبتعتبره شهيد حتى يعني حتى المعايير الاسلامية قد غيرناها بما يتلائم مع صدام

وانا بحب نوه لنقطة بالنهاية انو لازم ما نربط بين كرهنا لامريكا واطماعها السياسية والاستراتيجية وموضوع اعدام صدام لانو صدام حتى ولو افترضنا انو محاكمته كانت سياسية ولكنها بشكل حقيقي وصادق محكمة جنائية بتحاسب مجرم كبير بحق الانسانية والدليل على ذلك هو كل بيت عراقي ناقص سرق صدام البسمة منو

[هنّوءة]

اخي ياسر ...
بدهون يسمحولي الشباب اجاوب عليك قبل ما اجاوب عليهون ... لانو في كتير اشيا مهمة و نقاط ذكرها ... ولازم نحكي فيها

اولا بالبداية ما بنكر و لا حدا بيقدر ينكر انو صدام قتل كتير ناس ظلم .. و بدون شفقة ولا رحمة .. و انو بمرحلة من المراحل كان عميل لامريكا
رح ابدا من النقطة التانية .... اخي جاوي ... لو بدنا نعتبر العمالة لامريكا جريمة عظمى ... كنا ( عذرا من الجميع ) بنقول انو تلات ارباع القادة العرب متل صدام .. بل و اسوأ ؟؟؟ لانو شفنا كلنا اللي صار بحرب لبنان ...
امريكا امرت صدام بخوض حربه مع ايران ... و بصراحة هيدا بيخليني اعطي صدام عذر ... بهيدي الحرب ... هو صحيح كان عندو ميول توسعية دائما ... بس بنفس الوقت .. ما كان فينو يقول لامريكا لأ ؟؟؟ لما قالتلو اغزو ايران و نحنا بنامنلك التغطية و الاسلحة ...
وغزو الكويت كان بهدف ضمها للعراق ( ضمن الحلم العربي ببناء وطن عربي واحد ) طبعا كانت طريقة صدام مختلفة .. بعمول وطن عربي واحد تحت قيادتي بعد ما احتل الدول او على الاقل الصغيرة و القريبة متل قطر و الكويت و البحرين و الامارات .. وحاول يعمول هالشي بالاتفاق مع الملك فهد الله يرحمو و اللي طبعا ما قبل ووقف مع الكويت مع معظم الدول العربية و منها سوريا .. هيدا الشي ولد كره بقلب صدام للنظام السوري ( الاشتراكي ) و اللي لازم ( بحسب راي صدام ) يكون الو نفس اهدافه ...
فحاول يعمول بلبلة بسوريا لتغيير الحاكم وليس لقلب النظام لانو اصلا كان فيه اشتراكية بسوريا و بالعراق ...
طبعا هيدي اعذار و حجج و بالاصل صدام اغلب قراراتو ما كان هو اللي يتخذها و انما امريكا .. متل ما عم بيصير هلا بنصف لبنان الشمالي ...
اما المجازر .. فكانت كتير وحشية .. بس انت قلتها .. كانت ضد الاكراد في الشمال اللي لهلا عندون رغبة بالاستقلال بدولة كوردستان اللي رح تاكول شمال العراق و شمال شرق سوريا و جزء من تركيا .. و هيدا الشي كان مستحيل يسمح فيه صدام .. فاستخدم القمع بالارهاب .. و عمل هالمجازر لحتا يزرع الرعب بقلوب الاكراد و يمنعهم من التفكير بالاستقلال مرة تانية
اما بالجنوب كمان نفس الشي لانو الشيعة كان عندون رغبة بقيام دولة شيعية بالجنوب .. ونفس قصة الشمال تتكرر
صدام افكارة كانت صح ... بس اسلوبو كان وحشي و غلط .. و كان بفترة من فترات حكمو مسير ... ولما تمرد ... شفت شو ساوو الامريكان فيه
ما لازم ابدا ننسى انو صدام هو الوحيد اللي هدد اسرائيل ... وكان عندو همّ عربي ربما اكتر بكتير من قادة تانيين ما عاد عندون غير هم الكرسي تبعون
وبالنسبة للجانب الانساني اللي انا رح ضل ركز عليه ...
لازم يضل فيه مجال للتوبة .. الاعدام مانو حل .. و اللي قتلو صدام ما عرفو قديش بدو يصير فيه حقد و زيادة في الاقتتال الطائفي بعد هالحركة .. يعني صدام ما كان رح يكون مؤذي .. بس قتلو .. مؤذي كتير .. وشفنا فورا كيف صدرت بيانات و صارت تفجيرات ...
اخي ياسر .. نحنا كعرب ما بيهمنا صدام كانسان .. بيهمنا العراق ... و العراق انأذى بقتل صدام اكتر مما استفاد اكيد ...
شكرا على مرورك .. وكتير فرحت بالنقاش معك
و عذرا على الاطالة

[ferasm]

المشكلة انو اللي عدم اصدام حسين مانو أحسن منو ، ولا حتى اللي حاكموه ولا حتى أمريكا ،


وانه حتى في أمريكا عقوبة الاعدام ممنوعة ،

طيب اعدام شخص مثل صدام هل ينهي المشكلة ؟؟؟


بالتاكيد لا ،


بل هو بداية لفتنة جديدة اذا لم ينتبه لها العراقيين .

اذا كان هو قد يستحق الاعدام او الرمي بالرصاص أو او أو......... .


الأية الكريمة تقول //ولكم في القصاص حياة يا أولي الألباب//
وعلينا ان ننظر في هذه الأية الكريمة جيدا وهي ان القصاص العادل مرتيط بالحياة وبذوي الألباب أيضا //

لا ادعي التفسير للآية الكريمة والافاء بها لتها ليست من اختصاصي حتما ،

ولكن علينا ان ننظر اليها كثيرا والتفكر بكلماتها جيدا ومعاني كلماتها أيضا // القصاص، الحياة ، الألباب//.

طيب صدام الآن بين يدي البارئ تعالى عز وجل، وهو وحده أحكم الحاكمنين وأكرم الكرمين وأعدل العادلين ،

طيب ،

الشعب الآن في العراق ، بعد اعدام صدام هل ستكون حياتهم في العراق أفضل الآن ؟؟؟!!!

الموضوع طويل جدا النقاش فيه لكن أحببت أن أقف حول هذه النقاط .

هنؤة يامتميزة شكرا لك لطرح هذا الموضوع الجريء.

[هنّوءة]

ملك سوريا ....
انا بصراحة حاولت جهدي ضل برا موضوع صدام بس ما مشي الحال
واضطريت ادافع نسبيا عن انسان كتير حولو فيه جدل

بس بكل الاحوال صار السؤال الاول بالشارع العربي .. انت مع او ضد
وهيدا لشي ما فينا نتجاهلو .. لانو نحنا بالاصل ممثلين لمجتمعاتنا



عصي الدمع
شكر ا كتير على مرورك اللطيف .. و ميرسي انك صفّيت معي لانو كنت بديت حس اني غلط اني متعاطفة مع صدام او واقفة ضد اعدامه
وطبعا لولا اختلاف وجهات النظر ما ولد الحوار

[هنّوءة]

أحمد
اولا نووووورت بمشاركتك
تاني شي .. انا ما بقول انو صدام بريء لحتا ينقطع الحبل هنن و عم يشنقوه ...
بس بعتقد انو صدام كان بيستحق فرصة للحياة و التوبة عن اخطاءة
لانو قتله رح يولد مشكلة اكبر بكتير من تركو عايش
بس شو بدنا نحكي .. اعدام صدام كان الشعرة التي قسمت ظهر البعير ...
يعني هيدي الطلقة الاخيرة اللي اطلقها الامريكان على العراق لتدميرو
و الله يعين العراقيين


فراس
ما فيي قوللك غير اني معك مية بالمية
وشكرا على مشاركتك الغنيّة ... و المقنعة ...


باياااات للكل

[سندريلا]

هلأ صدام مات و راح

صح إله أغلاط كل غلط بصراحة أكبر من جمل

بس مع هيك أنا ضد الإعدام

لأنو الله يلي بعاقبه مو البشر

في سجن في غرامات وفي كتير عقوبات

بس إعدام والله إحساس صعب لما تفكر إنك رح تموت وما بتعرف إيمتى

فكيف لو تعرف إنك بكرة رح تموت؟

الموت بإيد الله بأي طريقة سواء إعدام أو قتل أو غيره

هاد من وجهة نظري

وهنّوءة مواضيعك دائما مميزة....دمت بخير

[&wissam&]

يا شباب وصبايا خلونا برات هالمواضيع كلها وخلونا نهتم فقط باميرتنا شهووودة

[هنّوءة]

سندريلّتي ... نووووووووورت بمشاركتك
ورايك من رايي ...... قتل البشر صعب ...
مرة تانية شكرا على مرورك الرائع




أخي وسام ......
كمان نوووورت بمشاركتك ...
وبالنسبة لموضوع النقاش ... فمعك حق انو حساس و يعني ممكن للحظات نفكر انو بيجيب وجع راس عالفاضي طالما الرجل مات
بس بنفس الوقت .. كان ضروري نتناقش بهالموضوع .. لانو فكرة الاعدام هي فكرة مرفوضة بالمجتمعات الحديثة ... و هي لساتها مطبقة عنا .. فنحنا كجيل شباب من واجبنا تجاه وطننا نناقش الموضوع مع بعض ... و نشوف اذا اعدام مجرم هو الحل الوحيد .. أو في حلول تانية بديلة ...
لحتا نعرف اذا مناسب نلتحق بالدول الاوروبية اللي ترفض عقوبة الاعدام .. و نناقش الموضوع بشكل موسع باعتبار المنتدى هو شريحة منوعة من المجتمع .. لحتا نعرف اذا كنا مع فكرة الاعدام او لاء .. ولحتا لما يقرر قادة دولنا الغاء العقوبة هيدي نقبل او نرفض القرار .... مو انو نقبلو بس لنلتحق بالتطور الاوروبي بشكل اعمى او نرفضو لانو نحنا بنرفض العولمة فقط ...
شي اخير ... المنتدى منتدى فني ... و هو منتدى اميرتنا الغالية كتير كتير كتير علينا ... ولما ننزل موضوع للنقاش مو شرط يكون عن الاميرة والا بيجو الفرسان الزرق و بيخطفوه الى كواكب الاميرة شهد .. المستقر الفعلي لهالمواضيع ...و لما ننزل موضوع متل هيدا ما بيكون قصدنا خلق مشكلة لا سمح الله .. لانو كل الداخلين بيعرفو انو الاختلاف بالراي لن يفسد أبدا للود قضية ... و انما قصدنا نخلق موضوع للتواصل و التعبير عن الراي بجو من الود و الصداقة ... و الكل هون الو حرية النقاش و التعبير عن رايو ..
لهيك بتمنى عليك انو تعطينا رايك باللي كنا عم نحكي فيه .. و تاكد انورايك بيهمنا . كونك ابن الجنوب الصامد ... ووسام منتدى شهد برمدا الوحيد ...
عذرا على الاطالة .... باياااات