قرار منع الضرب في المدارس

[هنّوءة]

هايات للكل
ايام زمان ... كان منظر الاستاذ مرتبط بالعصا ..اللي يحملها لحتا يعاقب طلابو المشاغبين و اللي مو حافظين او مو كاتبين وظائفون ... ويمكن زيادة بهيبة الاستاذ امام طلابة
هلا صار فيه قانون يمنع الضرب بالمدارس ... وبيحرم الاستاذ من معاقبة الطالب و حتى ارهابه بالكلام او استخدام لغة التهديد تجاهه
الفكرة كانت انو الضرب للحيوانات بس اللي ما عندها عقل و ما بتفهم بالكلام ... و انو الطلاب مجرد اطفال او مراهقين و ممنوع ارهابهم او ضربهم ... وانما التوجيه بيكفي لحتا يمشي الطالب على السراط المستقيم
وهلا بدي اسالكون .. برايكون

هل اسلوب الحوار مع الطلاب بالتوجيه كافي لحتا الطالب يدرس .. او على الاقل يلتزم بسلوك هادئ يحترم فيه حق رفاقة بالدراسة ضمن الصف _ اذا كان هو ما هامة هالموضوع –

هل من حق وزارة التربية تجريد الاستاذ من سلاحة الوحيد بصفّ فيه الطلاب كل سنة عن سنة عم بتزيد ( شيطنتون ) و شقاوتون و قلة احترامهم لاداب السلوك و احترامون للمدرسة كمؤسسة تعليمية و لكل الكادر اللي فيها

هل العصا كانت دافع للطالب لحتا يدرس و يحفظ مشان يهرب من القتلة و البهدلة قدام رفاقو ولا هيي وسيلة قمع بايد المدرس تهين انسانيته كل ما حب المدرس يهينو

هل انتم مع الضرب بحالات قليلة ... لما يزيدها الطالب

بجو انمنع فيه الضرب بالمدارس .. شو الوسائل البديلة اللي ممكن تحدد سلوك الطالب و تعاقبة اذا اخطا

بمدرسة يمنع فيها الضرب .. بتفضل تكون طالب او استاذ

لو كنت طالب بهالمدرسة .. و بتعرف انو الضرب ممنوع هل بتستغل الفرصة بتزيد شقاوتك او بتحترم الثقة اللي منحتك ياها المؤسسة التعليمية هيدي

ولو كنت استاذ و طلبت من طالب عم بيضجّ بالصف انو يسكوت ليفهمو البقية .. ونط بخلقتك و قاللك انت عم ترهبني بكلامك بدي اشتكي عليك لمديرية التربية .. شو بتساوي ؟؟؟؟
بايااااااات

[shadi]

اهلين اختي هناء

بصراحة موضوع جدآ رائع والحوار فيه مشوق ..

هل اسلوب الحوار مع الطلاب بالتوجيه كافي لحتا الطالب يدرس .. او على الاقل يلتزم بسلوك هادئ يحترم فيه حق رفاقة بالدراسة ضمن الصف _ اذا كان هو ما هامة هالموضوع –

الاسلوب الراقي بالحوار يعتمد على الاقناع عند الطلاب
اذا كان المدرس يجيد وسيلة الاقناع
بالتأكيد سيقنع الطالب بأن الشيء الغلط هو غلط .. والصح هو الصح
وسيلتزم الطالب بكل طلبات الاستاذ
وهذا يعتمد على الاستاذ بنفسه ..


هل من حق وزارة التربية تجريد الاستاذ من سلاحة الوحيد بصفّ فيه الطلاب كل سنة عن سنة عم بتزيد ( شيطنتون ) و شقاوتون و قلة احترامهم لاداب السلوك و احترامون للمدرسة كمؤسسة تعليمية و لكل الكادر اللي فيها

انا اعترف ان الاستاذ اذا كان قاسيآ على من هم اشقياء
بالتأكيد يفيد ويفيد كثيرآ
اما عن وزارة التربية وقرارهم
لو وجدو حل اخر كان افضل .. لان الضرب احيانآ مع بعض الطلاب
يكون ضروري جدآ للحفاظ على سلوكه وعدم اظهار الشقاوة الكبيرة
وايضآ افساد اخلاق بعض الطلاب الذين من حوله ..

هل العصا كانت دافع للطالب لحتا يدرس و يحفظ مشان يهرب من القتلة و البهدلة قدام رفاقو ولا هيي وسيلة قمع بايد المدرس تهين انسانيته كل ما حب المدرس يهينو

استطيع ان اجاوب وبنسبة لا تقل عن الـ 80 بالمئة نعم هي الدافع بالطبع
لان جميعنا يمر برهبة الاستاذ عندما نحضر الى الصف ولا نكون انجزنا عملنا بالوظيفة مثلآ او حفظنا شيء طلبه منا .. بالتأكيد سيحفظه الطالب الشقي بالدرجة الاولى اذا لم يكن من اجل دراسته بالتأكيد من اجل خوفه من المدرس ..

هل انتم مع الضرب بحالات قليلة ... لما يزيدها الطالب

نعم انا مع الضرب عند تعجيز الطالب لاستاذه واستنفذ كل وسائل الاقناع لديه

بجو انمنع فيه الضرب بالمدارس .. شو الوسائل البديلة اللي ممكن تحدد سلوك الطالب و تعاقبة اذا اخطا

لا يوجد وسيلة غير وسيلة الاقناع .. وهي ناجحة لمن هم يجيدونها فقط ..

بمدرسة يمنع فيها الضرب .. بتفضل تكون طالب او استاذ

بفضل اكون مدرس لاني اجيد وسيلة الاقناع جيدآ والاقناع اهم شيء يملكه المدرس بعد الضرب

لو كنت طالب بهالمدرسة .. و بتعرف انو الضرب ممنوع هل بتستغل الفرصة بتزيد شقاوتك او بتحترم الثقة اللي منحتك ياها المؤسسة التعليمية هيدي

الجواب معروف استفيد من الثقة الي منحتني ياها المؤسسة وبفيد اصحابي كمان ..

ولو كنت استاذ و طلبت من طالب عم بيضجّ بالصف انو يسكوت ليفهمو البقية .. ونط بخلقتك و قاللك انت عم ترهبني بكلامك بدي اشتكي عليك لمديرية التربية .. شو بتساوي ؟؟؟؟

عندما يمنع الاستاذ من الضرب وارهاب الطلاب بالكلام
بالطبع سأتقيد بالتعليمات
ولكن احترامي للطلاب يفرض احترامهم لي بالطبع
واذا لم يكونو جميعآ .. بالتأكيد الاغلبية ..


شكرآ هناء على الموضوع
ودمتي بود ..

[هنّوءة]

شكرا كتير اخي شادي على النقاش الحلو كتير
بصراحة انا كنت حابة اناقش بهالموضوع و كنت مقررة اتمسك بموقفي .. اللي هو ضد قرار الغاء عقوبة الضرب .. لاني لما كنت طالبة كنت شقية كتير و بعرف قديش ممكن يكونو الطلاب لئيمين ... وهلا انا على وشك صير مدرسة .. وبدون العصا اللي كنت عم احلم امسكها واقضي على طلابي فيها صرت محتارة كيف بدي اواجه هالوحوش الصغار حتى اني عم افكر اشتغل اي شي حتى لو كان خارج حدود دراستي بس لحتا اهرب من هالمواجهة الغير متكافئة

انا vs قاعة معبية طلاب عم بيشوفوني مدرسة الكيميا الشريرة
طبعا انا معذورة بموقفي لاني ما بعتقد حكون مدرسة حازمة .. و الاقناع بظن ما اقدر عليه لاني مو متاكدة اذا رح اقدر الزم الطلاب يقعدو بمحلاتون و يسمعوني لحتا اقنعون خخخخخخخخخخخخخخخخخخخخخ
بكل الاحوال .. الضرب هو وسيلة مو غاية بالتاكيد .. و الطلاب صايرين عم يتقاوو بهالقرار هيدا .. ومو عرفانين انو هالقرار بيحميلون انسانيتون مو بيغطيلون على شقاوتون
شكرا كتير اخي شادي على مرورك اللطيف جدا .. و عنجد لو صرت استاذ كانو طلابك حيكونو موفقين و محظوظين فيك لانك باين رايق كتير و بتطول بالك
مو متلي .. لانو صارت خطتي البديلة .. كل طالب بيزعجني بقوللو اطلع وما ترجع غير مع وليّ امرك خخخخخخخخخخخخخخخخخخخخخخ
بي باي

[الشهداوي]

عمروا الضرب ما حل مشكلة

يعني انا عن حالي و عشان كون واقعي

لما مرة بالصف التاسع ضربني استاذ عصاية

رديتلو اياها كف و كبرة المشكلة

لأنو هالطالب بني آدم و عندو كرامة

و الاستاذ انسن بيخطأ و بيظلم



الحل هو انو يكون الشخص مؤهل ليكون استاذ

يعني يكون عندو شخصية تفاعلية مع الطلاب

ما بيعود يحتاج بحكي اسكوت

و اذا حكاها لواحد بتكون اشد من ضرب


اما انو اي واحد حطو استاذ بس حملو عصاية

أبدا مش حل

و عندنا بالاردن موجود هالقانون من الزمان

وفي كتير اساتذة راحوا بسبب هالقانون على المخافر


فأنا مع القانون 100%

[نغم الربيع]

هل اسلوب الحوار مع الطلاب بالتوجيه كافي لحتا الطالب يدرس .. او على الاقل يلتزم بسلوك هادئ يحترم فيه حق رفاقة بالدراسة ضمن الصف _ اذا كان هو ما هامة هالموضوع –

انا برأيي طبعا كافي وازا ما مشي الحال فمن حق المعلم انو يطرد الطالب لبرا الصف
هل من حق وزارة التربية تجريد الاستاذ من سلاحة الوحيد بصفّ فيه الطلاب كل سنة عن سنة عم بتزيد ( شيطنتون ) و شقاوتون و قلة احترامهم لاداب السلوك و احترامون للمدرسة كمؤسسة تعليمية و لكل الكادر اللي فيها
طبعا من حقهون لانو كمان بنفس الوقت كنا عم نلائي اساتذة عم يسعملو العصا بشكل مفرط ومؤذي للطالب او تعبيرا عن عقدة نفسية
هل العصا كانت دافع للطالب لحتا يدرس و يحفظ مشان يهرب من القتلة و البهدلة قدام رفاقو ولا هيي وسيلة قمع بايد المدرس تهين انسانيته كل ما حب المدرس يهينو
للبعض اي بس ازا كانت العصا دافعو بالتعليم الاساسي لحد الثانوية يعني فهو اكيد حيترك بعد ما يخلص الباكلوريا وبالنهاية ما استفدنا شي
هل انتم مع الضرب بحالات قليلة ... لما يزيدها الطالب
لا الضرب ما بحل شي
بجو انمنع فيه الضرب بالمدارس .. شو الوسائل البديلة اللي ممكن تحدد سلوك الطالب و تعاقبة اذا اخطا
في الطرد والفصلواستدعاء الاولياء وفي الحالات اللي بكون الطالب عامل غلط كتير كبير المنع عن كل مدارس القطر
بمدرسة يمنع فيها الضرب .. بتفضل تكون طالب او استاذ
طالب واستاذ
لو كنت طالب بهالمدرسة .. و بتعرف انو الضرب ممنوع هل بتستغل الفرصة بتزيد شقاوتك او بتحترم الثقة اللي منحتك ياها المؤسسة التعليمية هيدي
يعني اكيد بحترم هالثقة اللي منحتني ياها المؤسسة
ولو كنت استاذ و طلبت من طالب عم بيضجّ بالصف انو يسكوت ليفهمو البقية .. ونط بخلقتك و قاللك انت عم ترهبني بكلامك بدي اشتكي عليك لمديرية التربية .. شو بتساوي ؟؟؟؟
بئلو وانت عم تتواقح معي وبدي افصلك عن المدرسة

لك يسلمو يا هنوءة على هالموضوع التحفة

[0ـُرجان]

ممممممم http://smilies.sofrayt.com/%5E/l/reading.gif

بما انو هنوءة مقبلة على ان تكون مدرّسة الله يوفقها طبعا وعمتفتح موضوع الضرب وعمتقول انها ضد قرار منعو هذا يعني حسب قانون نيوتن للجاذبية انها تريد موافقة شرعية مننا نحن الاعضاء ضد هذا القرار يعني عمتاكلي بعقلنا حلاوة خخخخخخخخخخخخخ لا لا والله هنوءة عمبمزح ها اوعا تاخديها جد

والله فعلا انو موضوع يستحق للنقاش هنوءة تشكري عليه

بقولوا انو العصاية من الجنة وبقولوا كمان انو الضرب وسيلة بدائية تخلصت منها الدول المتقدمة منذ نهاية عصور الحرب العالمية الثانية ولم نتخلص منها نحن بعد ولنبينا محمد (ص) حديث شريف للأسف لا استحضره الآن يبيح لنا فيه بالضرب على اليدين ان اقتضت الحاجة

فلذلك بصراحة هي اول مرة بحس انو ما عندي رأي ثابت تجاه قضية معينة

ولكن اكيد انو الضرب عادة وشغلة مو منيحة وسيئة واكيد كمان انو في نوعية معينة من الطلاب لا تجد الكلمة الحلوة من سبيل للوصول اليهم

واكيد كمان انو في الطالب الصالح والطالب الطالح واذا صرتي مع الزمان مدرّسة ان شاء الله وقانون الغاء الضرب لم يطبق ففرقي دائما بين الصالح والطالح وتوقعي ان يوقع الطالح بالصالح وهنا تكون المسؤولية مسؤوليتك كمعلمة لان قانون منع الضرب لم يطبق :3:

شكرا هنووووؤة على الموضوع موضوع توب كالعادة

[هنّوءة]

اياد ... هيك بدنا نبلش نزعل من بعض

لما مرة بالصف التاسع ضربني استاذ عصاية

رديتلو اياها كف و كبرة المشكلة

هون يا جماعة بيبدا الغلط ... يعني الاستاذ ما عندو حماية من تصرفات طالب ... وفعلا الاستاذ سلطتو وصلاحياتو صارت اقل بكتير من ايام زمان ..
يعني انا كنت طالبة مو من زمان و بعرف شو كنا نساوي باساتذتنا .. فعلا كان يكون ضحية سهلة كتير كتير بين ايدينا و لمجرد انو ابن المدير معنا بالصف نعرف انو لو شو ما ساوينا ما رح يصير علينا شي

اخي اياد .. انا ما عم قول يروح الاستاذ حامل بايدو كرباج و يمسك الطلاب يضربون بسبب وبلا سبب .. بس بنفس الوقت ما في قوانين صارمة تمنع الطلاب اللي ممكن يكونو مئذيين بطبعون انةو يهينو كرامة الاستاذ ..
الطالب هو طالب علم ... عم يجي على المدرسة و الدولة بتوفرلو كل شي بيلزمو حتى الكتب بالمجان .. و المدرس بيحرق اعصابو هو بيدرس فيه .. فاذا كان الطالب عم يتغالظ بالصف و كان ما بيسمع الكلمة فيه حل من اتنين .. يا اما ينطرد من الصف ويروح عليه الدرس .. يا اما ياكول عصايتين بتنهان كرامتو شوية بس بيكمل الدرس مع رفاقو وما بيروح عليه شي ..

الحل هو انو يكون الشخص مؤهل ليكون استاذ

يعني يكون عندو شخصية تفاعلية مع الطلاب

ما بيعود يحتاج بحكي اسكوت

و اذا حكاها لواحد بتكون اشد من ضرب


اما انو اي واحد حطو استاذ بس حملو عصاية

أبدا مش حل

طبعا كلامك فيه وجهة نظر و هيدا اسمو عنا دبلوم التاهيل التربوي وهيدا بيعملوه كل الخريجين قبل ما يدرسو بالمدارس ...
بس بنفس الوقت ما فيك تعتمد عليه لانو مع تطور اساليب المدرس عم بيطورو الطلاب اساليبون الشريرة ...
وما بيعود قدام المدرس حل غيرانو يا يطرد الطالب يا ييستدعي ولي امره اللي بيكون غالبا بدنيا تانية و ابنه اخر همّه ..
كمان في شي كتير مهم بننساه ...
ايام زمان كان شيخ الكتاب او شيخ الجامع سلطة عليا .. و انسان محترم و مهاب من كل طلابو و كان يحمول عصا ... و يضروب فلقة
وحتى على زمني كان كتير من الاساتذة يدخلو حاملين عصا و يضربو عالطالعة و النازلة بس ما يضربو غير لما نكون غلطانين .. و هيدا الشي ما بيعود يتعلق بالكرامة و انما المخطئ يعاقب .. فاذا خايفة على كرامتي ما في داعي اتشيطن ...
سوري على طولة الرد بس اياد لو شو ما صار و مهما كانت كرامتك غالية غلط كبير تضرب استاذك ...
ومو لاني ممكن اصير انسة عم احكي هالحكي وانما هيدا رايي و مقتنعة فيه مية مية
بي باي

[هنّوءة]

له يا نغومتي له .. كمان انتي ؟؟؟ بس قولي انتي معذورة .. طالبة لانك
وكمان رح اناقشك بردّك الخطير


انا برأيي طبعا كافي وازا ما مشي الحال فمن حق المعلم انو يطرد الطالب لبرا الصف

اذا طرد الطالب .. بيروح عليه الدرس .. والطالب بيفرح لانو هيدا اللي بدو ياه .. يطلع على الساحة يتسلى احسن من قعدة الاستاذ المعتّة ... في حين انو اذا اكل عصايتين بيهدا و بيكمل الدرس اجباري عنو

بنفس الوقت كنا عم نلائي اساتذة عم يسعملو العصا بشكل مفرط ومؤذي للطالب او تعبيرا عن عقدة نفسية

طبعا كلامك صح بجزء منو .. يعني فيه جزء قليل من الاساتذة ممكن يكون عندون مشكلة مع طلابون و الضرب .. بس هيدا شي كتير نادر .. الا اذا اعتبرتي انو كل الاساتذة معقدين .. و هيدا اكيد مو صح
و انا اكيد ضد الضرب زيادة عن اللزوم بس عم احكي عن الضرب عند الخطأ

ازا كانت العصا دافعو بالتعليم الاساسي لحد الثانوية يعني فهو اكيد حيترك بعد ما يخلص الباكلوريا وبالنهاية ما استفدنا شي
هون بدي اختلف معك ... لو كان كلامك صح يا نغم ما كنتي شفتي حدا من عمري و لفوق دارس .. لانو كل اللي درسو قبل القانون هيدا اكلو ضرب و مع هيك درسو و تفوقو وما تركو الدراسة ... وطبعا العصا بتعلم الالتزام مو بتجبر الواحد بس ...

هل انتم مع الضرب بحالات قليلة ... لما يزيدها الطالب



لا الضرب ما بحل شي

طيب برايك شو الحل لما يزيدها الطالب ؟؟؟؟
طبعا انتي قلتي انو
في الطرد والفصلواستدعاء الاولياء وفي الحالات اللي بكون الطالب عامل غلط كتير كبير المنع عن كل مدارس القطر
اقتباس

برايك انو ياكول عصايتين ما احسن ما يجي ولي امرو عالمدرسة ؟؟ او ينطرد برا مدارس القطر ؟؟؟؟ او على الاقل يقضي الفصل الدراسي بالساحة ؟؟؟
و انتي خديها على حالك .. و انا باخدها على حالي .. اي مية عصاية ولا اجيب بابا على مدرستي كاني عاملة شي عملة خطيرة

بمدرسة يمنع فيها الضرب .. بتفضل تكون طالب او استاذ



طالب واستاذ

ليش ؟؟؟ :12:


يعني اكيد بحترم هالثقة اللي منحتني ياها المؤسسة

انتي ممكن تعملي هيم بس غيرك شو ؟؟؟ كل الطلاب بيقولو هيك بس تعي عالتطبيق ... لما بيعملو مقلب بالاستاذ ما حدا بيتذكر شي .. وبيكونو فرحانين بالنصر الموطبيعي ..على الاستاذ




بئلو وانت عم تتواقح معي وبدي افصلك عن المدرسة

اي اسمعي لكن هالخبرية :13: ما بيحقلو للاستاذ يفصول طالب من المدرسة حتى لو سبّو هههههههههههههههههههههههه أخبار سعيدة للطلاب

بي باااااااي

[هنّوءة]

اهلين والله اخي ياسر
بما انو هنوءة مقبلة على ان تكون مدرّسة الله يوفقها طبعا وعمتفتح موضوع الضرب وعمتقول انها ضد قرار منعو هذا يعني حسب قانون نيوتن للجاذبية انها تريد موافقة شرعية مننا نحن الاعضاء ضد هذا القرار

له يا ياسر .. غلطان كتير .. انا بدي اكتر من هيك بكتير ... بدي تحتجو و تثورو وتطلعو مظاهرات و هيك قصص مشان يلغو القرار هيدا .. اي والله الطلاب تبع هالايام بيخوفو .... معقول ندخول لعندون بدون الاسلحة و الذخائر ؟؟؟

بس على فكرة انت اكتر واحد حكيت حكي على ذوقي اسمعو مثلا
بقولوا انو العصاية من الجنة ولنبينا محمد (ص) حديث شريف للأسف لا استحضره الآن يبيح لنا فيه بالضرب على اليدين ان اقتضت الحاجة في نوعية معينة من الطلاب لا تجد الكلمة الحلوة من سبيل للوصول اليهم
لاحظت انو اخدت الجمل اللي بدي ياها بس ؟؟؟
فعلا انا اذا صرت مدرسة بحس انو اضروب الطالب عصاية و يوجعو شوية احسن ما اطردو و يروح عليه الدرس ...
لهيك بما انو خبرتني انو قانون منع الضرب لم يطبق
فانا رح اضل اشتغل فيه .. و عالحالتين رح احمول المؤشر تبع اللوح و اكيد بيوجع اذا انضرب فيه ..مو ؟؟؟؟
واكيد اخي انا ما رح روح و هدفي معاقبة الطلاب و الانتقام منون .. و متل ما قلت انت انو
في الطالب الصالح والطالب الطالح واذا صرتي مع الزمان مدرّسة ان شاء الله وقانون الغاء الضرب لم يطبق ففرقي دائما بين الصالح والطالح وتوقعي ان يوقع الطالح بالصالح وهنا تكون المسؤولية مسؤوليتك كمعلمة

شكرا كتير كتير اخي ياسر على مرورك و كان النقاش معك حلو كتير
سي يوووو بمواضيع تانية
وفيلين دانكية
بي باي

[عصي الدمع]

أنا بصراحة مع هنوءة في كل ما قالته بأدلتها وردودها

كلامها واقعي ويوافق الشرع كما ذكر الأخ مرجان

بس المشكلة اللي ما يفهم كيف يطبقه

بعضهم يبالغ في الضرب لدرجة سيئة

واللي ما بيحبوه بيستغلوا هاي الناحية ضد الضرب المفيد

أنا أعرف ناس أحسوا بنفع الضرب فيما بعد

ومش قلال

بس في البداية يكون الواحد متحفز ، وما بيعرف مصلحته

في حديث بالمعنى إن النبي صلى الله عليه وسلم ما سمح بالضرب فوق

ثلاث مرات وبشيء رقيق لا غليظ للتأديب

والله أعلم


شكرا هنوءة على الموضوع

[هنّوءة]

اخي عصي الدمع
شكرا كتير على مرورك ورايك
وشكرا انك وافقتني بالراي
سهلت عليي كتير
وانشاللا بيكونو كل الاساتذة رؤوفين مع طلابون بس حازمين كمان
مرة تانية شكرا
وبي باي

[ريم الغلا]

موضوع مهم

مشكورة هنووءة

الف تحية

[عراب الدير]

الأخت هنوءة اول شي الله يعينك عل المسؤولية الراح تشيليه بس تصيري انسة وتقيم موضوع الظرب بالمدارس الو خلفيات كتيرة غير الشي الى نعرفوا لما كنا طلاب ففي شي ما كنا نفكر فيه وهو مصداقية الاستاد
1-الأستاذ والمعلمة قدوة لطلابهم بأي مرحلة فإذامرت على المدرس لحظة اخرجته عن صورته المثالية امام طلابه كالموقف للأخ اياد ردلواياها كف و لم يرد الاستاذ بعقاب رادع فقد مصداقيته وسقطت صورة القدوة حتى يصبح كل ما يصدر عنه من كلام او شرح او معلومات موضع شك لدى الطالب
2-بكل تأكيد التلميذ بشر له كرامة ولكن خير ما نقتدي به في عملية التعليم هو نبينا العظيم وديننا الحنيف وايات القران أغلبها تمحورت حول الترهيب من المعصية والترغيب بالايمان
وهذه خير وسيلة تستخدم مع الطالب الترهيب من الاهمال والترهيب من الشغب
والترغيب بالنشاط والادب
فما هي وسيلة الترهيب - الطرد - لو فكرنا به بعقل التلميذ هو ترغيب بالاهمال والشغب وليس ترهيب
أذكر أن منظر العصا الموضوعة على الطاولة خير كفيل لقمع كل الوساوس التي تدور في أذهاننا
وأذكر انها لم تستعمل الا نادرا ومع ذلك فقد ادت واجبها اي ان وجود العصا دون استخدامها كفيل لنشر الترهيب
3- الدول المتقدمة تمنع الضرب: لهذا هي تعاني من انحلال خلقي وفي مدارسها وبين طلابها مروجي مخدرات فالى هذا المستوى نريد ان نصل بمدارسنا

أنا ضد هذا القرار بشكل كامل واليه اعزي هذا الفشل الملاحظ منذ بضع سنين في نتائج الشهادتين الاعدادية والثانوية

اخير يقال الادب فضلوه على العلم فإذا غادر الادب مدارسنا فلم يعد فيها خير يرجى
اسف على الاطالة لكن موضوع مهم جدا ويحتاج الكثير الكثير من الدراسة والحوار
شكر لك

[شيراز عاشقة سلمى المصري]

انا بقول انو في كتيير اساليب لتعامل وما بعمرو الضرب حل مشكلة الا بالعكس بزيدهااا

لهيك لازم الكل يستعمل طرق حضارية وذات منفعة اكتر في التعامل ....


مرسي على طرح الموضوع عوأأأأفي....

[sasa]

شكرا علي الموضوع المهم كتير